Luke 9

Jesus e hagau nia dama agoago dilongoholu maa lua

(Matthew 10.5-15; Mark 6.7-13)

1Jesus ga haga dagabuli ana dama agoago dilongoholu maa lua, ga wanga gi digaula nia mogobuna mo nia mahi e hagabagi nia hagataalunga huaidu mo di hagahili nia magi huogodoo. 2Gei mee ga hagau digaula bolo gi agoago ina Tenua o God ge gi hagahili nia magi, 3i muli dana helekai gi digaula, “Hudee kae mee i godou hula, hudee kae togodogo, budehede dagidagi meegai, palaawaa, bahihadu, be nia gahu digagi. ^a 4Maa digaula ga benebene goodou, ulu gi lodo di hale deelaa, noho i golo, ga dae loo gi di godou hagatanga i di waahale deelaa. 5Gei digau o di gowaa deelaa ga hagalee benebene goodou, ulu gi daha mo di waahale deelaa, duduia godou babaawae, e hai di haga modongoohia gi digaula.” ^b 6Nia dama agoago ga hagatanga, ga hula i lodo nia waahale lligi huogodoo, ga hagadele di Longo Humalia mo di hagahili nia magi i nia gowaa huogodoo.

Lodo hinihini Herod

(Matthew 14.1-12; Mark 6.14-29)

7Herod di tagi o Galilee ne longono ia nia mee huogodoo ala ne hai, gei mee gu lodo hinihini huoloo, idimaa, hunu daangada e helekai bolo John Babdais ne mouli aga. ^c 8Hunu gau e helekai bolo ma go Elijah ne gila aga, gei hunu gau e helekai bolo mee dahi soukohp i nia soukohp namua ne mouli aga. 9Gei Herod ga helekai, “Au gu tuu di libogo o John gi daha, gei ma koai taane deenei dela ono longo aanei?”

Gei mee e hagamahi e mmada gi Jesus.

Jesus e haangai ana daane e lima mana(5,000)

(Matthew 14.13-21; Mark 6.30-44; John 6.1-14)

10Digau agoago hagau ga loomoi, ga hagi ang gi Jesus nadau mee huogodoo ala ne hai, gei mee ga lahi digaula mada ginaadou gi di waahale Bethsaida. 11Digau dogologo ala ne longono ga hula i muli o mee. Mee ga benebene digaula, ga helehelekai gi digaula i di hai o Tenua o God, ga hagahili nia magi digau ala e magi. 12Hiahia ia di mee, gei ana dama agoago dilongoholu maa lua ga loomoi gi mee ga helekai, “Hagau ina digau aanei gi hula gi nia waahale lligi mono gowaa dogi mee, gi halahala nadau mee e gai mono gowaa e noho ai, idimaa, di gowaa deenei le e lomo.” 13Gei Jesus ga helekai, “Goodou gi bida haangai ina digaula.”

Gei digaula ga helekai, “Nia palaawaa hua e lima ge lua iga i golo. Goe e hiihai gimaadou gi hula e hui mai madau meegai gi di hagabuulinga dangada dogologo deenei?” 14Nia daane e lima mana(5,000) ala nogo i golo.

Jesus ga helekai gi ana dama agoago, “Heia digaula gi noho gi lala i nia hagabuulinga daangada dagi madalima.” 15Muli hua nia dama agoago a maa ne haga noho digaula, 16Jesus ga dahi mai nia palaawaa e lima ge lua iga, ga mmada gi di langi, ga danggee ang gi God, ga ginigini, ga wanga gi ana dama agoago gi duwwaa gi digaula. 17Digaula gu miami huogodoo gu maaluu, gei ana dama agoago ga haa nadau gada meegai dubu e madangaholu maa lua.

Peter e haga modongoohia Jesus

(Matthew 16.13-19; Mark 8.27-29)

18Dahi laangi hua, gei Jesus e dalodalo modogoia, gei ana dama agoago ga loomoi gi mee, gei mee ga heeu gi digaula, “Nia daangada le e hai bolo au koai?” 19Digaula ga helekai, “Hunu gau e helekai bolo goe go John Babdais, gei hunu gau e helekai bolo goe go Elijah, gei hunu gau i lodo digaula e helekai bolo goe dahi soukohp i nia soukohp namua ne mouli aga.” ^d 20Gei mee ga helekai gi digaula, “Gei goodou bolo au koai?” ^e

Gei Peter ga helekai, “Goe go di Mesaia a God.”

Jesus e helekai i dono hagaduadua mo dono made

(Matthew 16.20-28; Mark 8.30—9.1)

21Jesus ga helekai maaloo gi digaula, bolo gi hudee hagi anga ina di mee deenei gi tei dangada. 22Mee ga helekai labelaa, “Tama Tangada e hai loo gi hagaduadua, ge e hai gi haga balumee go nia dagi mmaadua, digau aamua hai mee dabu mo digau haga dondonu haganoho. Mee ga daaligi gi made, nia laangi e dolu nomuli ga hagamouli aga.” 23Mee ga helekai gi digaula huogodoo, “Maa tangada e hiihai e daudali mai au, geia gi haga de langahia ina dono mouli, gi dahi aga ina dono loobuu i nia laangi huogodoo, daudali mai au. ^f 24Idimaa, tangada dela e hiihai e benebene dono mouli, ga de gidee dono mouli. Gei tangada dela ga hudu gi daha dono mouli i di Au, la ne benebene dono mouli. ^g 25Di humalia aha e kae go tangada dela ma ga hai mee gi henuailala hagatau, nomuli gei mee ga hagalee? 26Maa tangada ga langaadia i di au mo agu agoago, gei Tama Tangada le e langaadia labelaa i tangada deelaa, i dono madagoaa ma ga hanimoi ai i nia madamada o Tamana mo digau di langi haga madagu. 27Au e hagi adu gi goodou di tonu, bolo hunu gau i ginei hagalee mmade, ga dae loo gi di nadau gidee Tenua o God.”

Di huli o Jesus i di gonduu

(Matthew 17.1-8; Mark 9.2-8)

28Hoohoo di tabu e dahi i muli ana helekai i nia mee aanei, gei Jesus ga lahi a Peter, John mo James dalia ia gi tomo di gonduu belee dalodalo. ^h 29Dono madagoaa hua e dalodalo, gei ono hadumada gu huli, gu hai gee, gei ono gahu gu kene hila mmaa. 30Homouli hua gei nia daane dogolua, go Moses mo Elijah, e helehelekai gi mee. 31Meemaa ne kila mai i lodo nia madamada o di langi, ga helekai gi Jesus i dana hai ga hai hoohoo mai, e haga honu di mee a God dela bolo ia e made i Jerusalem. 32Peter mo ono ehoo gu kii danu mmoe, ga ala aga, ga mmada gi di madamada o Jesus mo nia daane dogolua ala e tuu i baahi o mee. 33Di hagatanga hua nia daane dogolua i baahi o Jesus, gei Peter ga helekai, “Tagi, gidaadou gu humalia huoloo ne noho i ginei! Gimaadou ga hau madau damaa hale e dolu, e dahi ni aau, e dahi ni Moses, gei e dahi ni Elijah.” (Gei mee digi iloo humalia ana helekai ne hai.) 34Di madagoaa hua a mee dela e leelee, di gololangi ga haneia, ga gahu digaula. Ana dama agoago gu mmaadagu i di madagoaa di gololangi deelaa ne gahu digaula. 35Di lee ga helekai mai i lodo di gololangi, “Deenei dagu dama daane gu hilihili ko au. Hagalongo gi mee!” ⁱ 36Di madagoaa di lee ne noho, gei Jesus gu modogoia. Ana dama agoago gu noho dee muu, gei digi hagi ang gi tangada i nadau mee ala ne mmada ginai.

Jesus e hagahili tama daane iai di hagataalunga huaidu i ono lodo

(Matthew 17.14-18; Mark 9.14-27)

37Di laangi nomuli, gei Jesus mo ana dama agoago dogodolu ga lloo ia i tomo di gonduu, gei di hagabuulinga dangada dogologo ga heetugi gi Jesus. 38Tangada ga wolo mai baahi digau dogologo aalaa boloo, “Tangada Agoago, au e dangi adu gi mmada gi dagu dama daane dela hua e dahi! 39Di hagataalunga huaidu gu hagahuaidu a mee, gu hai a mee gi wolowolo, gi gaehagaeha, gi puu biabi dono ngudu, dela hua dana hai e haga mmaemmae a mee, hagalee hagatanga gi daha mo mee. 40Au ne dangi ang gi au dama agoago bolo gi haga bagia di maa gi daha, gei digaula e deemee.” 41Jesus ga helekai, “Goodou digau de hagadonu gei e hala! Au e hai gi noho dalia goodou gi waalooloo behee? E waalooloo behee dagu hagamaamaa goodou?”

Gei mee ga helekai gi taane, “Laha mai dau dama daane gi kinei.” 42Tama daane la ga hanimoi, gei di hagataalunga huaidu ga hudu a mee gi hongo di gelegele, ga hai a mee gi gaehagaeha. Gei Jesus ga hagabagi di hagataalunga huaidu, ga hagahili a mee, ga wanga a mee gi dono damana. 43Digau huogodoo gu goboina di mogobuna mahi o God.

Jesus e helekai labelaa i dono made

(Matthew 17.22,23; Mark 9.30-32)

Nia daangada e gobonina huaigolo i nia mee huogodoo ala ne hai go Jesus, gei mee ga helekai gi ana dama agoago, 44“Goodou hudee de langahia dagu mee dela ga hagi adu: Tama Tangada le e dugu ang gi nia mogobuna o nia daangada.” 45Nia dama agoago a maa digi modongoohia ginaadou telekai deenei. Idimaa, ma ne dugu hagammuni i digaula bolo gi de iloo di maa, gei digaula nogo mmaadagu di heeu gi mee.

Koai e kaedahi e aamua?

(Matthew 18.1-5; Mark 9.33-37)

46Di lagamaaloo gu hai i mehanga nia dama agoago a Jesus, be di maa koai i ginaadou dela e aamua. ^j 47Jesus gu iloo nia maanadu digaula, ga gahi mai dana damagiigi, ga haga duu i dono baahi, 48ga helekai gi digaula, “Be koai hua dela ga benebene di tama deenei i dogu ingoo, la ne benebene hua au, gei tangada dela e benebene au, la ne benebene hua tangada dela ne hagau mai au. Tangada dela i mugi lala loo i goodou, deelaa tangada e aamua i goodou huogodoo.” ^k

Be koai hua dela hagalee hai baahi adu gi goodou, la di hoo ni goodou

(Mark 9.38-40)

49John ga helekai aga, “Tagi Aamua, gimaadou gu mmada gi tangada e hagabagi ana hagataalunga huaidu i doo ingoo, gei gimaadou gu bule a mee, idimaa mee hagalee tangada i tadau buini.” 50Jesus ga helekai gi mee mo ana dama agoago ala i golo, “Goodou hudee bule ina a mee, idimaa, tangada dela hagalee hai baahi adu gi goodou, la di hoo ni goodou.”

Di waahale Samaria hagalee benebene Jesus

51Jesus ne hoohoo ga hana gi di langi, gei mee ga maanadu ga hana gi Jerusalem. 52Mee ga hagau ana gau kae hegau gi hula i ono mua gi di waahale dulii i Samaria e hagatogomaalia nia mee huogodoo ang gi deia. 53Gei digau ala i golo hagalee benebene Jesus, idimaa, gu modongoohia bolo mee e hana gi Jerusalem. 54Di madagoaa nia dama agoago a maa go James mo John ne iloo ginaua di mee dela ne hai, meemaa ga heeu, “Meenei Tagi, goe e hiihai bolo gimaua gi gahigahi di ahi gi haneia i di langi e hagahuaidu digaula?” ^l 55Jesus ga huli adu, ga hagawelewele gi meemaa. 56Nomuli, gei Jesus mo ana dama agoago ga hula gi tuai waahale.

Digau ala ga daudali a Jesus

(Matthew 8.19-22)

57Di nadau hula i hongo di ala, taane ga helekai gi Jesus, “Au ga daudali goe gi nia gowaa huogodoo ala e hana ginai goe.” 58Jesus ga helekai, “Nia manu-“fox” la nadau bongoo i golo, nia manu mamaangi nadau waehongo i golo, gei Tama Tangada la dono madagoaa e kii ge e hagamolooloo ia ai.” 59Gei mee ga helekai gi tuai daane, “Daudali mai i ogu muli.”

Gei taane ga helekai, “Meenei, dumaalia mai, au e hana e danu dogu damana i mua.” 60Jesus ga helekai, “Dugua gi digau mmade gi danumia nadau gau mmade. Gei goe hana, hagadele ina Tenua o God.” 61Tuai dangada ga helekai, “Au e daudali adu goe, gei i mua dumaalia mai gi di au e hana, e hai dagu hagaaloho gi digau dogu hale.” ^m 62Gei Jesus ga helekai gi mee, “Tangada ma ga daamada e haga maluu dana hadagee, ge e mmada gi muli, le e balumee gi Tenua o God.”